Veni, Sancte Spiritus

1. Veni, Sancte Spíritus,
   Et emítte coélitus
   Lucis tuae rádium.

2. Veni, pater páuperum,
   Veni, dator múnerum,
   Veni, lumen córdium.

3. Consolator óptime,
   Dulcis hospes ánimae,
   Dulce refrigérium.

4. In labóre réquies,
   In aestu tempéries,
   In fletu solátium.

5. O lux beatíssima,
   Reple cordis íntima
   Tuórum fidélium.

6. Sine tuo númine,
   Nihil est in hómine,
   Nihil est innóxium.

7. Lava quod est sórdidum,
   Riga quod est áridum,
   Sana quod est sáucium.

8. Flecte quod est rígidum,
   Fove quod est frígidum,
   Rege quod est dévium.

9. Da tuis fidélibus
   In te confidéntibus
   Sacrum septenárium.

10. Da virtútis méritum,
    Da salútis exitum,
    Da perénne gáudium. Amen!

℣. Emítte Spiritum tuum, et creabúnter.
℟. Et renovábis faciem terrae.

Oremus.
Deus, qui corda fidélium Sancti Spíritus illustratióne docuisti da nobis in eódem Spíritu recta sápere; et de eius semper consolatióne gaudere. Per Christum Dominum nostrum. Amen.